Конечно и кај нас 3D!

Супер вест! Уште да носат филмови како што треба.

Велат дека најактуелна и најскапа 3D опрема на светскиот пазар е веќе инсталирана во Кино Милениум.

Премиерата е на 4-ти февруари во 20 часот со новиот филм на Wim Wenders под наслов Pina, кој доби награда за најдобар документарен филм на European Film Awards. Самиот Wenders кога ја примаше наградата, истакна дека филмот бил правен специјално за 3D.

Од 5-ти февруари, покрај Pina (кој ќе остане на редовен репертоар од 22:30), во терминот од 17:30 и 20:00 ќе следува филмот The Darkest Hour, SF-хорор со многу ефекти.

Се надевам дека после ќе следуваат уште поинтересни наслови, посебно од полето на SF и хорор филмот. Да речеме, The Avengers или пак новиот Batman и Spiderman, како и Hobbit.

Пополека, но сигурно, Скопје почнува да личи на град.

Филмов е луда комедија. Не сум се смеел овака оддамна на филм. Режисер е Срѓан Драгоевиќ, кој стои зад неколку познати филма како Ние не сме Ангели, Рани, Убави села убаво горат, како и ланскиот Монтевидео, Бог те видео (Montevideo, God Bless You).

Во главната улога е Никола Кујо, а игра и Тони Михајловски, како и еден куп познати фаци од Ние не сме Ангели, серијата Подобар Живот итн.

Во филмов е прикажано организирањето на првата геј парада во Белград, која не заврши баш успешно. Филмов завршува трагично, но сепак со надеж дека во иднина ќе биде подобро.

http://www.imdb.com/title/tt1784575/

Филмов игра во кино Милениум, и тоа до петок, кога започнува да игра големиот хит The Girl With The Dragon Tatoo, римејк на шведскиот култен филм од 2009, базиран според книгата бестселер. Станува збор за трилогија. Овојпат, американците да не останат покуси, направија римејк, со тоа што режија е David Fincher (Seven,The Game,Fight Club,Social Network), музиката е на Trent Reznor од Nine Ich Nails (кој го направи оној феноменален саундтрак за Social Network, за кој доби и Оскар), а главната улога му е доделена на Daniel Craig, кој е моментално актуелен и со одличниот филм Dream House.

Една убава вест за почеток на новата година, посебно за љубителите на добриот звук, е најавата за враќање на Енко и компанија на сцената. Бендот кој не работи веќе десет години (мада последен настап им беше во 2004), реши да се собере повторно, па макар тоа да биде и еден концерт. И тоа во оргиналната постава.

Концертот најверојатно ќе се случи во склоп на Scream Festival, кој ќе се одржи на 11 Февруари 2012. Last Expedition ќе настапат со многу гости, а истата вечер ќе настапат и Sanatorium, кои минатата година направија камбек со настап. Еве ги сега пак, со тоа што се надевам дека овојпат ќе настапат во оргиналната постава.

Во текот на месецов, ќе излезе цела програма на фестивалот.

Од скоро време, и кај нас, се појави изданието на Алнари од Србија на ремек делото Сјаење на мајсторот на хоророт Стивен Кинг. Конечно, би рекол. После 20 книги кои Алнари ги издадоа од Кинг, еве му ја можеби и најважната книга, барем по популарност. После оваа книга, тој станува вистински популарен. Популарност здобил уште со првата книга Кери, но со оваа книга тој станува вистински магнет за сите што сакаат да читаат SF и хорор, иако Кинг имаше излети и во други жанрови. На пример, многумина не знаат дека тој е автор и на бестселерите Бегство од Шошенк, Зелена Милја, Мизери, Долорес Клејборн, Срца во Атлантис итн.

Но, да се вратам на книгата. Преводот е на српски секако. На македонски ја нема и ќе ја нема. После неуспешниот обид да се преведе Cell (Мобилен), чиј превод е многу лош, никој изгледа тука кај нас не се најде храбар да преведува книга од Кинг. Истото важи и за некои SF автори како Артур Кларк и Исак Асимов. Но, тоа не пречи секако, барем според мене. Тие што си го купуваа Кинг досега, ќе го купуваат и понатака.

Интересна информација е дека Кинг ја напишал книгата на скоро исто место како и локацијата во книгата. Кинг го напуштил домот, заминал со својата фамилија на планина, во еден хотел-одмаралиште, паднал снег, и така се започнало. Добил идеја да пишува. Интересно е и тоа дека тоа е единствениот пат Кинг да го напушти родниот Мејн (го има во скоро 90 посто од неговите книги). Сите други книги, тој ги напишал дома на својата машина, а последниве неколку книги (конечно) ги креирал на лап-топот. Кинг е тип на писател, кој никогаш не сакал да се движи во елитата, во т.н. шема. Можеби тука лежи и тајната на неговиот успех. Секоја книга му е посебна и одлично оценета од критиката и фановите. 90 посто од неговите дела се филмски адаптирани, а тој присуствува скоро на секое снимање на тие филмови, а во скоро секој филм или серија по негово дело се појавува на кратко, па макар и на неколку секунди.

По романот The Shining е снимен филм во режија на големиот Стенли Кјубрик со Џек Николсон. Според мене, тоа е можеби најдобриот хорор филм воопшто снимен. Но, Кинг не бил многу задоволен од продуктот на Кјубрик. Поради тоа, тој бил упорен со филмските студија да се сними нов филм или серија, со цел да се прикажат сите работи од книгата, кои биле пропуштени во филмот. Така е снимена и серија, која патем е одлична.

Интересно е и дека Кинг оваа година ќе пишува продолжение на The Shining. Имено, тој на својот сајт ги прашал своите фанови дали сакаат нов дел од The Dark Tower или втор дел на The Shining. После еден месец, резултатите покажале на The Shining.

Еве уште некои новини за сите фанови на Кинг:

Наскоро, поточно во Јануари 2012 излегува во печат неговата нова книга Mile 81, која се надевам дека ќе биде преведена од страна на Алнари.

The Dark Tower ќе го режира Ron Howard, кој стои зад неколку ремек дела, како на пример Beautiful Mind, a главниот лик Роланд ќе го глуми Javier Bardem. Одлична екипа, би рекол. Ќе се снимаат два или три филма, а и серија во неколку продолженија. Иначе, книгата е поделена на 7 дела и има 3500 страни. Кој не ја прочитал, му ја препорачувам, тоа е вистинско ремек дело и е најважното дело на Кинг, кое го пишувал цел свој живот. Во книгата има ликови од многу негови романи, така да тука сите се среќаваат на еден многу интересен начин. Плус и самиот Кинг си се ставил како лик. Снимањето на серијалот ќе започне во 2012.

Пред неколку дена излезе и мини серијата или ТВ филмот Bag of Bones, според истоимената книга. Книгата е одлична, а се надевам дека и серијата е добра. Во главната улога е Pierce Brosnan, кој го толкува ликот на Мајкл Нунан. Серијалот трае 4 часа.

И за на крај, би додал дека во нашиот град, може да се најдат и некои други нови романи од Кинг во издание на Алнари. И тоа, The Stand, која е поделена на три дела, како и неговиот последен роман Under The Dome (Под Куполата) од 2009, и тоа со тврда корица, што е одлично.

Чекаме на Carrie, првиот роман на Кинг, која ќе биде издадена од Алнари на пролет. Дотогаш, The Shining!

Лани пишував за нив, сега би сакал повторно, но накратко. Немам намера да ги набројувам наградите, или да пишувам што се се случи на манифестацијата. Шоуто може да се види на HBO, го даваат стално на програмата, или пак во видеотеката на Max Tv.

Искрено, од сите овие т.н. награди, вклучувајќи го и Оскарот, оваа ми е најмила. Прво, не трае 5 часа како Оскарите, туку час и половина, а второ, нема гламур, туку актери и режисери кои без никакво китење, доаѓаат да ги проследат наградите и најдоброто од годината, во рамките на Европа.

Оваа година домаќин беше Берлин.

За најдобар филм беше прогласен новиот филм на Ларс Вон Триер наречен Меланхолија, кој предизвика бура во филмскиот свет.

Филмот In A Better World доби награда за режија, a за најдобар актер беше прогласен Colin Firth за улогата во The King’s Speech.

За најдобар документарец беше прогласен Pina на Wim Wenders.

Како посебна награда беше достигнување во филмот која му беше доделена на одличниот актер  Mads Mikkelsen, кој одлично ни го претстави композиторот Игор Стравински во филмот Coco & Igor, a го видовме и во Casino Royale, King Arthur, After the Wedding, Clash of the Titans итн.

И како за на крај, еве мои предлози до вас, од номинираните филмови на филмските награди:

The Turin Horse – филмот на Бела Тар, го видовме и на Cinedays

The Rabi’s Cat – симпатичен анимиран филм со многу хумор

Essential Killing – за љубителите на трилер жанрот

The Kid With a Bike – филм кој освои неколку награди по фестивалите

Le Havre – филмот на Аки Каурисмаки, кој го видовме на Cinedays

Habemus Papam – или во превод Имаме Папа

Влезете во филм!

Не ми се верува! Како вчера да беше.

Започнав тука на mp3blog (voodoo) во Октомври 2006. Се сеќавам дека тогаш беше џез фестивалот, и тогаш настапија EST. Така добив идеја и јас да напишам нешто за концертот и да отворам блог. Блогот сеуште постои… Во декември го отворив и овој блог (lounge), а веднаш потоа и voodoo lounge. Сакав трилогија, а сакав и да се поврзе насловот на блоговите со албумот и турнејата на Rolling Stones (мој прв концерт надвор од земјава во 1995).

И ете… поминаа пет години… еден куп постови, коментари, нова платформа, сеуште сум тука.

Жив сум!

Супер вест за сите филмомани! Овој викенд е специјален викенд!

На филмскиот канал TV1000, денес и утре, еден куп филмови од неповторливиот Вуди Ален.

Главни термини се оние од 18, 20 и 22 часот.

Ќе бидат прикажани класиците “Хана и Нејзините Сестри”, “Сенки и Магла”, “Ени Хол”, “Менхетн” итн.

Влезете во филм!

Сабота навечер-вечер на феноменалните Morphine!

Прво, филм за групата и за лидерот Mark Sandman, кој почина на многу трагичен начин, го фати срцето за време на концерт во Италија. Почина пред својата публика. Morphine снимија само пет албуми, но поради својот уникатен стил и интересна постава, тие влегоа во историјата на музиката засекогаш.

The Mark Sandman Story започнува во 23 часот во кино Фросина, МКЦ. Влезот е бесплатен.

Во музичкиот документарец, ќе учествуваат Josh Homme (Queens of the Stone Age), Les Claypool (Primus) и еден куп други познати фаци од светот на музиката, кои биле на некој начин инспирирани од делото на триото Morphine.

Веднаш после документарниот филм, ќе има и Tribute за Morphine или како што Фолтин велат - Foltin doin’ Morphine!

Свирката започнува во 00:30.

Значи, Фолтин со песни од Morphine. Ова е еднаш и ќе нема реприза.

И за концертот, влезот е бесплатен.

И филмот и концертот се во склоп на фестивалот Cinedays, кој трае веќе една недела.

Уште еден добар филм на Duncan Jones. Првенецот Moon му е ремек дело во SF жанрот. Филм кој е споредуван дури и со Кјубриковиот 2001: A Space Oddyssey. Можеби споредбата е претерана, но едно е сигурно. Moon е можеби најоргиналниот SF филм во последниве десет години, па можеби и повеќе. Веднаш до него би се залепил евентуално District 9.

Новиот филм “Изворен Код” е заплеткан SF филм, кој ќе ве остави без зборови. Но, и на размислување. И тоа прво, до каде оди човековата фантазија? Па најверојатно, до бескрај.

Филмов можеби ќе ве потсети по малку на Deja Vu, или пак на Minority Report, но само малку. Денес тоа е неизбежно. Скоро, се е измислено. Зарем не? Но, ете нешто и ново. А тоа ви го понудува овој филм. Ако го споредувам со Inception, на пример, тогаш ќе изјавам дека ова е барем десет пати подобар филм. Тука, во 90 минути е прикажан и решен целиот проблем, многу ефективно, брзо, со многу акција. Додека, во филмот на Nolan, тоа е заморно до бесвест, за да после два и пол часа, сфатите дека можеби сте изгубиле драгоцено време.

Главната улога ја толкува Jake Gyllenhaal, кој го имаме видено во Donnie Darko и Brokeback Mountain. Во другите улоги, се појавуваат Vera Farmiga (Up In The Air, Orphan) и одличниот Jeffrey Wright (Angels in America, D-Tox).

Искрено, не би сакал ништо повеќе да кажам, ниту пак да ја прераскажувам по шаблонски пат содржината. Филмот треба да се гледа, а посебно не треба да го пропушти ниеден SF фан.

На крај, можам само да заклучам дека Duncan Jones e најсвежото нешто што се појавило во филмската индустрија. Со душа го чекав овој филм, откако бев воодушеван од Moon, со душа ќе му го чекам и следното остварување, или подобро да кажам остварувања.

И сосема на крај, за тие што не знаат, Duncan е син на David Bowie. Има со што да се гордее David. Duncan е новиот гениј во филмската уметност.

Duncan и David на премиерата на Moon на Sundance Festival 2009

Ремек дело!